ເມື່ອບໍ່ດົນມານີ້, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ມາຣຽມ ເຊີແມນ(Mariam Sherman)ຜູ້ອຳນວຍການທະນາຄານໂລກ ຮັບຜິດຊອບ ສປປ ລາວ, ກຳປູເຈຍ ແລະ ມຽນມາ ເພື່ອແນະນຳຕົວຢ່າງເປັນທາງການ ແລະ ເພື່ອປຶກສາຫາລື ໃນການເພີ່ມທະວີການຮ່ວມມືສອງຝ່າຍ ລະຫວ່າງ ກະຊວງການເງິນ ແລະ ທະນາຄານໂລກ ໃນການສະໜອງທຶນແກ່ໂຄງການບຸລິມະສິດ ສຳລັບການພັດທະນາເສດຖະກິດ-ສັງຄົມ ຢູ່ ສປປ ລາວ.
ທ່ານ ບຸນໂຈມ ອຸບົນປະເສີດ ໄດ້ສະແດງຄວາມຂອບໃຈມາຍັງ ທ່ານນາງ ມາຣຽມ ເຊີແມນ ທີ່ໃຫ້ຄວາມສຳຄັນ ແລະ ຊ່ວຍເຫລືອ ສປປ ລາວ ຕະຫລອດໄລຍະຜ່ານມາ ນັບຕັ້ງແຕ່ເຂົ້າຮັບຕຳແໜ່ງໃນປີ 2020. ປັດຈຸບັນ, ສປປ ລາວ ຍັງໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະ ບັນດາປັດໄຈພາຍນອກອື່ນໆ ທີ່ສົ່ງຜົນກະທົບຢ່າງຕໍ່ເນື່ອງ.
ໂດຍສະເພາະຕໍ່ການພັດທະນາເສດຖະກິດ-ສັງຄົມ, ຕໍ່ການດຳລົງຊີວິດຂອງປະຊາ ຊົນ ຈຶ່ງຍັງມີຄວາມຈຳເປັນທີ່ຈະຂໍການສືບຕໍ່ສະໜັບສະໜູນ ຈາກທະນາຄານໂລກ ແລະ ສະເໜີສືບຕໍ່ຊຸກຍູ້, ສະໜັບສະໜູນ ໂດຍສະເພາະການຊ່ວຍເຫລືອດຸ່ນງົບປະມານແກ່ ສປປ ລາວ ຜ່ານແຜນງານດັດແກ້ມະຫາພາກຕ່າງໆ.
ສຳລັບແຜນ ພື້ນຖານການສ້າງຍຸດທະສາດການຮ່ວມມືກັບສປປ ລາວ 2022-2026 (CPF) ໃນໄລຍະໃໝ່, ກະຊວງການເງິນ, ພ້ອມຈະສືບຕໍ່ເຮັດວຽກຮ່ວມກັບກະຊວງແຜນ ການ ແລະ ການລົງທຶນ, ພ້ອມທັງຂະແໜງການກ່ຽວຂ້ອງເພື່ອສ້າງຂອບຍຸດທະສາດການຮ່ວມມືໄລຍະໃໝ່ ໃຫ້ສອດຄ່ອງກັບບູລິສິດຂອງລັດຖະບານ ຕາມແຜນພັດທະນາເສດຖະ ກິດ-ສັງຄົມ 5 ປີຄັ້ງທີ 9 ແລະ ວາລະແຫ່ງຊາດ ທີ່ສະພາໄດ້ຮັບຮອງ.
ພ້ອມດຽວກັນ, ກໍໄດ້ສະເໜີທະນາຄານໂລກ ພິຈາລະນາການສະໜອງການຊ່ວຍ ເຫລືອເຂົ້າໃນວຽກງານຫັນເປັນທັນສະໄໝ ໃນຂົງເຂດການເງິນ. ທັງນີ້, ກໍເພື່ອກະຕຸກຊຸກຍູ້ຮັບປະກັນ ສາມາດເກັບລາຍຮັບໄດ້ຄົບຖ້ວນ ແລະ ສາມາດເກັບລາຍຮັບໄດ້ຫລາຍຂຶ້ນກວ່າເກົ່າ, ສະເໜີທະນາຄານໂລກ ພິຈາລະນາວ່າຈ້າງ ບໍລິສັດປະເມີນຊັບສິນ ທີ່ມີຊື່ສຽງຂອງໂລກ ເພື່ອປະເມີນບັນດາຊັບສິນຂອງ ສປປ ລາວ ເປັນການສ້າງຄວາມເຊື່ອໜັ້ນໃຫ້ນັກລົງທຶນທັງພາກພື້ນ ແລະ ສາກົນພ້ອມທັງກຳໄດ້ຂໍ້ມູນທີ່ໜັກແໜ້ນ ກ່ຽວກັບບັນດາຂໍ້ມູນຊັບສິນຂອງລັດ ໂດຍສະເພາະບັນດາໂຄງການລົງທຶນຂອງລັດ ໃນຂະແໜງພະລັງງານ ແລະ ບໍ່ແຮ່
