ສຳນັກຂ່າວ ຊິນຮວາ ຂອງຈີນ, ວັນທີ 1 ເມສາ 2022 ນີ້, ທ່ານ ຮຸນແຊນ ນາຍົກລັດຖະມົນຕີ ກຳປູເຈຍ ຖະແຫຼງວ່າ: ກຳປູເຈຍ ສາມາດ ຜະລິດ ຄຳແທ່ງ ບໍລິສຸດ 90% ໄດ້ 2.275 ກິໂລກຣາມ ຕັ້ງແຕ່ ເລີ່ມຂຸດຄົ້ນແຮ່ຄຳ ໃນເດືອນມິຖຸນາ ປີກາຍ ໂດຍຄຳທັງໝົດ ມາຈາກ ການຂຸດຄົ້ນ ໃນບໍ່ແຮ່ຄຳ ພຽງໜຶ່ງແຫ່ງ ຈາກຫຼາຍໆແຫ່ງ ໃນປະເທດ ເທົ່ານັ້ນ.
ຂະນະທີ່ ບໍລິສັດ Renaissance Minerals ( Cambodia ) ໃນກຸ່ມ Emerald Resources NL ຈົດທະບຽນ ໃນອົດສະຕຣາລີ ເປັນຜູ້ພັດທະນາ ບໍ່ແຮ່ຄຳ ໃນພື້ນທີ່ ອົກບາວ Okvau ເຂດແກ້ວສິມມາ Kaewsima ໂດຍບໍລິສັດ Renaissance Minerals ສາມາດຜະລິດ ຄຳບໍລິສຸດ ໄດ້ປະມານ 3 ໂຕນຕໍ່ປີ
ພາຍໃນໄລຍະເວລາ 8 ປີທຳອິດ ແລະ ມີທ່າອຽງ ສ້າງລາຍໄດ້ ຈາກໂຄງການ ບໍ່ແຮ່ຄຳ ແຫ່ງນີ້ ປະມານ 185 ລ້ານໂດລາ ສະຫະລັດ ຕໍ່ປີ ໂດຍເງິນ ປະມານ 40 ລ້ານໂດລາ ສະຫະລັດ ຈະເຂົ້າຄັງເງິນ ຂອງກຳປູເຈຍ ຜ່ານພາສີ ແລະ ການສຳປະທານ.
(ທີ່ມາຂ່າວ: ສະໄຫວ ລາດປາກດີ, ຂປລ)
