ຫຼາຍປະເທດກໍ່ພົບການປັ່ນປ່ວນຂອງນໍ້າມັນ ທຸກຄົນທົ່ວສັງຄົມຕ້ອງຍອມຮັບ ແລະ ທຳໃຈ ກັບສະຖານະການຕົວຈີງ.

ຢູ່ປະເທດເຮົາຕ້ອງຍອມຮັບເລື່ອງການເໜັງຕີງຂອງລາຄານ້ຳມັນ ຍ້ອນວ່າພວກເຮົານຳເຂົ້າຢ່າງດຽວ ໂດຍສະເພາະນ້ຳມັນສຳເລັດຮູບ; ຄັນພວກເຮົາສາມາດກັ່ນຕອງນ້ຳມັນດິບໄດ້ເອງ ຄິດວ່າລາຄານ້ຳມັນກໍຄົງຈະຖືກລົງບາງຊະນິດ.

ອີງຕາມຂໍ້ມູນກົມການຄ້າພາຍໃນ; ກະຊວງອຸດສາຫະກຳ ແລະ ການຄ້າ ຄັ້ງວັນທີ 24 ກຸມພາ ນັ້ນມີບາງຂໍ້ມູນທີ່ເພື່ອນຜູ້ອ່ານຄວນກຳໄດ້ເຊັ່ນວ່າ: ນ້ຳມັນທີ່ເຮົາໃຊ້ພາຍໃນປະເທດນີ້ແມ່ນນຳເຂົ້າຈາກປະເທດໄທ ແລະ ສສ ຫວຽດນາມ ເປັນສ່ວນຫຼາຍ, ການນຳນົດລາຄານຳເຂົ້າ ແມ່ນອີງຕາມການເໜັງຕີງຂຶ້ນ-ລົງ ຂອງຕະຫຼາດໂລກໃນແຕ່ລະໄລຍະເຊິ່ງຢູ່ພາຍໃນປະເທດ ແມ່ນມີການປັບລາຄານ້ຳມັນໃນທຸກ 15 ວັນ.

ໃນໂຄງປະກອບລາຄານ້ຳມັນຢູ່ປະເທດເຮົາລວມມີ (1)ພາສີ (2)ອາກອນຊົມໃຊ້ (3)ອາກອນມູນຄ່າເພີ່ມ (4) ກອງທຶນບູລະນະທາງຫຼວງ (5)ຄັງແຮ (6)ຄ່າບໍລິການ. ຜ່ານມາໂດຍນັບແຕ່ຕົ້ນປີ 2022 ເປັນຕົ້ນມາ ທາງພາກລັດກໍໄດ້ຄົ້ນຄວ້າ ໂດຍຫຼຸດອາກອນມູນຄ່າເພີ່ມລົງເຫຼືອ 7% ຈາກ 10% ແລະ ຫຼຸດຄັງແຮນ້ຳມັນທຸກຊະນິດລົງມາເຖິງປັດຈຸບັນແມ່ບໍ່ເກັບແລ້ວ(ເຫຼືອ 0ກີບ/ລິດ).

ຫາກເບິ່ງປະເທດໃກ້ຄຽງເຊັ່ນ: ປະເທດໄທ ຫຼື ສສ ຫວຽກນາມ ເຂົາເຈົ້າກໍປັບລາຄາຂຶ້ນຕາມການເໜັງຕີງຂອງຕະຫຼາດໂລກ.

ຫາກແນມອອກໄປເບິ່ງໂລກພາຍນອກ ແລ້ວຈະເຫັນລາຄານ້ຳມັນທະລຸ 100 ໂດລາຕໍ່1ບາເຣລແລ້ວ (ລາຄານ້ຳມັນດິບ) ເຊິ່ງມັນກໍມີຫຼາຍປັດໄຈ ເຊິ່ງໃນນັ້ນແມ່ນກຸ່ມຜະລິດນ້ຳມັນ OPEC ແລະ ບັນດາປະເທດຜູ້ຜະລິດນ້ຳມັນຍັງແຂ່ງຂັນກັນເລື່ອງກົດລາຄາໃຫ້ສູງຂຶ້ນ ລວມໄປເຖິງບັນຫາຂໍ້ຂັດແຍງຢູ່ເອີຣົບຕາເວັນອອກ (ລັດເຊຍກັບອູ ແກຣນ) ຢ່າລືມລັດເຊຍຜະລິດນ້ຳມັນໄດ້ 10 ລ້ານບາເຣລຕໍ່ວັນ ຫຼື 1 ໃນ 10 ຂອງປະລິມານນ້ຳມັນທີ່ໃຊ້ແຕ່ລະວັນຂອງໂລກ, ສະນັ້ນ ຫາກວິກິດລະຫວ່າງລັດເຊຍ ກັບ ອູແກຣນ ແກ່ຍາວ; ການຂວ້ຳບາດເອີຣົບເລື່ອງຂໍ້ຕົກລົງນິວເຄຼຍຍັງສືບຕໍ່ຍິ່ງຈະເຮັດໃຫ້ປະລິມານຜະລິດນ້ຳມັນໜ້ອຍລົງແລ້ວການສະໜອງບໍ່ພຽງພໍຍາມນັ້ນລາຄານ້ຳມັນກໍບໍ່ສາມາດຫຼຸດລົງໄດ້.

ນັ້ນຄືບາງຂໍ້ມູນທີ່ຊອກຫາມາເລົ່າສູ້ກັນຟັງ; ຈຸດສຳຄັນເລື່ອງລາຄານ້ຳມັນນີ້ ຢາກໃຫ້ເພື່ອນຜູ້ອ່ານຕິດຕາມຂ່າວລາຄານ້ຳມັນໂລກກໍຄືການປັບຂຶ້ນ-ລົງ ຂອງລາຄານ້ຳມັນຢູ່ປະເທດໃກ້ຄຽງເຮົາ ເປັນຕົ້ນແມ່ນ ປະເທດໄທ; ສສ ຫວຽດນາມ.

ທາງອອກກໍມີແຕ່ຕ້ອງຍອມຮັບໃນເຫດຜົນ ແລະ ປະຢັດທໍ່ນັ້ນທາງອື່ນກໍຄົງເປັນໄປໄດ້ຍາກ, ສະເໜີເພື່ອແລກປ່ຽນນໍ!

Related Posts

Leave a Reply

Your email address will not be published.