ລັດຖະບານຍີ່ປຸ່ນ ຊ່ວຍເຫຼືອ​ສ້າງລະບົບການແຈ້ງເຕືອນໄພນໍ້າຖ້ວມລ່ວງໜ້າໃຫ້ ສປປ​ ລາວ​ ມູນ​ຄ່າ​ 1​ ຕື້ເຢນ

ລັດຖະບານຍີ່ປຸ່ນ ຊ່ວຍເຫຼືອ​ສ້າງລະບົບການແຈ້ງເຕືອນໄພນໍ້າຖ້ວມລ່ວງໜ້າໃຫ້ ສປປ​ ລາວ​ ມູນ​ຄ່າ​ 1​ ຕື້ເຢນວັນທີ 2 ກຸມພາ 2022 ນີ້, ຢູ່ກະຊວງການຕ່າງປະເທດ ໄດ້ມີພິທີລົງນາມເອກະສານແລກປ່ຽນ ເພື່ອຮັບເອົາການຊ່ວຍເຫລືອລ້ານອກແຜນຂອງ ລັດຖະບານຍີ່ປຸ່ນ ໃນການສ້າງລະບົບການແຈ້ງເຕືອນໄພນໍ້າຖ້ວມລ່ວງໜ້າ ຢູ່ ສປປ ລາວ,

ເຊິ່ງຕາງໜ້າລັດຖະບານ ສປປ ລາວ ເຊັນໂດຍ ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າລັດຖະບານຍີ່ປຸ່ນ ແມ່ນທ່ານ ໂຄບາຢາຊິ ເຄນອິຈິ (Mr. KOBAYASHI Kenichi), ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ມີບັນດາພະນັກງານຈາກຂະແໜງການກ່ຽວຂ້ອງ ທັງສອງຝ່າຍ ເຂົ້າຮ່ວມເປັນສັກຂີພິຍານ.

ການຊ່ວຍເຫລືອດັ່ງກ່າວ, ແມ່ນການຊ່ວຍເຫລືອເພື່ອສ້າງລະບົບການແຈ້ງເຕືອນໄພນໍ້າຖ້ວມລ່ວງໜ້າ ໃນ 6 ແຂວງເປົ້າໝາຍ ຂອງ ສປປ ລາວ ຄື: ແຂວງຈໍາປາສັກ, ສາລະວັນ, ສະຫວັນນະເຂດ, ເຊກອງ, ອັດຕະປື ແລະ ແຂວງຄໍາມ່ວນ ລວມມູນຄ່າ 1 ຕື້ເຢນ ຫລື ປະມານ 8,78 ລ້ານໂດລາສະຫະລັດ,

ເຊິ່ງຈະປະກອບສ່ວນອັນສໍາຄັນໃນການສະໜອງຂໍ້ມູນການພະຍາກອນອາກາດທີ່ຊັດເຈນ ແລະ ການແຈ້ງເຕືອນເພື່ອກະກຽມຮັບມືຢ່າງທັນການ ໃນ 6 ແຂວງເປົ້າໝາຍດັ່ງກ່າວ, ລວມທັງຈະເປັນການຊ່ວຍຫລຸດຜ່ອນຜົນກະທົບ ແລະ ຜົນເສຍຫາຍໃຫ້ເບົາບາງລົງ. ເນື່ອງຈາກວ່າໃນເດືອນສິງຫາ ແລະ ເດືອນກັນຍາ 2019 ຜ່ານມາ,

ຂົງເຂດພາກໃຕ້ ຂອງ ສປປ ລາວ ໄດ້ຮັບຜົນກະທົບຈາກພາຍຸໄຕ້ຝຸ່ນລະດູຮ້ອນ ອັນໄດ້ພາໃຫ້ເກີດມີຝົນຕົກໜັກ ແລະ ນໍ້າຖ້ວມ, ເຊິ່ງສົ່ງຜົນກະທົບຕໍ່ເສດຖະກິດ ແລະ ໂຄງລ່າງພື້ນຖານຢູ່ຂົງເຂດດັ່ງກ່າວຢ່າງໜັກໜ່ວງ ເປັນຕົ້ນແມ່ນ ຂົວ 97 ແຫ່ງ, ໂຮງຮຽນ 747 ແຫ່ງ, ໂຮງໝໍ ແລະ ສຸກສາລາ 43 ແຫ່ງ, ຖະໜົນຫົນທາງ 462 ແຫ່ງ ຖືກເປ່ເພເສຍຫາຍ, ສັດລ້ຽງ ຫລາຍກວ່າ 275.000 ໂຕ ໄດ້ຮັບຜົນກະທົບ, ລວມມູນຄ່າຄວາມເສຍຫາຍຫລາຍກວ່າ 164 ລ້ານໂດລາສະຫະລັດ.

ສະເພາະໃນຂົງເຂດ 6 ແຂວງເປົ້າໝາຍດັ່ງກ່າວ ກໍໄດ້ຮັບຜົນກະທົບຢ່າງໜັກໜ່ວງເຊັ່ນດຽວກັນ, ພົນລະເມືອງລາວ ປະມານ 153.800 ຄອບຄົວ ຫລື ປະມານ 765.000 ຄົນ ໄດ້ຮັບຜົນກະທົບ, ມີຜູ້ເສຍຊີວີິດ 19 ຄົນ, ເຮືອນຊານ ບ້ານຊ່ອງ ປະມານ 760 ຫລັງຄາເຮືອນ ຖືກເປ່ເພເສຍຫາຍ. ໃນພິທີດັ່ງກ່າວ,

ທ່ານຮອງລັດຖະມົນຕີຕ່າງປະເທດ ໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ການຮ່ວມມື ແລະ ການຊ່ວຍເຫລືອຂອງລັດຖະບານ ແລະ ປະຊາຊົນຍີ່ປຸ່ນ ໃນໄລຍະຜ່ານມາ, ອັນໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ເປັນແຕ່ລະໄລຍະ, ເຊິ່ງແມ່ນການຊ່ວຍເຫລືອທີ່ມີປະສິດທິພາບ, ມີປະສິດທິຜົນ ແລະ ແທດເໝາະກັບຄວາມຮຽກຮ້ອງຕ້ອງການຕົວຈິງ ຂອງ ສປປ ລາວ,

ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່າ ໄດ້ຮັບການຍົກລະດັບຂຶ້ນເປັນກ້າວໆ ແລະ ການຊ່ວຍເຫລືອຄັ້ງນີ້ ເປັນການຢືນຢັນຄືນຄໍາໝາຍໝັ້ນຂອງ ລັດຖະບານ ແລະ ປະຊາຊົນຍີ່ປຸ່ນ ທີ່ມີຕໍ່ລັດຖະບານ ແລະ ປະຊາຊົນລາວ ເພື່ອສະໜັບສະໜູນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025) ຂອງ ສປປ ລາວ ໂດຍສະເພາະ ແມ່ນການຈັດຕັ້ງປະຕິບັດແຜນງານທີ່ຕິດພັນກັບວຽກງານການປ່ຽນແປງດິນຟ້າອາກາດ ແລະ ການຮັບມືກັບໄພພິບັດທໍາມະຊາດ ຂອງ ສປປ ລາວ ໃຫ້ເປັນຮູບປະທໍາເທື່ອລະກ້າວ.ໂອກາດກັນ,

ທ່ານເອກອັກຄະຣາຊະທູດ ໂຄບາຢາຊິ ເຄນອິຈິ ໄດ້ຢໍ້າຄືນຄວາມສໍາຄັນຂອງໂຄງການຊ່ວຍເຫລືອຄັ້ງນີ້ ແລະ ຢືນຢັນຈະສືບຕໍ່ເຮັດວຽກຮ່ວມກັບຝ່າຍລາວຢ່າງຕັ້ງໜ້າ ເພື່ອສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມທີີ່ມີມາແຕ່ດົນນານ ຂອງ ສອງປະເທດ ຍີ່ປຸ່ນ ແລະ ສປປ ລາວ ກໍຄື ການເປັນຄູ່ຮ່ວມຍຸດທະສາດ,

ລວມທັງການສືບຕໍ່ຜັນຂະຫຍາຍແຜນການຮ່ວມມື (Action Plan) ທີ່ຜູ້ນໍາສອງປເທດໄດ້ຮັບຮອງຮ່ວມກັນ ໃນວັນທີ 7 ເມສາ 2021 ຜ່ານມາ ໃຫ້ປະສົບຜົນສໍາເລັດຕາມລະດັບຄາດໝາຍ.

Source: ຂປລ

Related Posts

Leave a Reply

Your email address will not be published.