ຊົມເຊີຍ👏👏 ແຂວງໄຊສົມບູນ ຈັດເກັບລາຍຮັບບັນລຸ 613,90 ຕື້ກີບ,

ຊົມເຊີຍ👏👏 ແຂວງໄຊສົມບູນ ຈັດເກັບລາຍຮັບບັນລຸ 613,90 ຕື້ກີບ, ເກີນແຜນ 221,62 ຕື້ກີບເມື່ອບໍ່ດົນມານີ້ ພະແນກການເງິນແຂວງໄຊສົມບູນ ໄດ້ເປີດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານການເງິນຮອບດ້ານ ປະຈຳປີ 2021 ແລະ ວາງທິດທາງແຜນການ ປີ 2022 ຂຶ້ນ ໂດຍການເຂົ້າຮ່ວມເປັນປະທານຂອງ ທ່ານ ສຸກສະຫວາດ ວົງພູມເຫຼັກ, ຮອງເຈົ້າແຂວງໄຊສົມບູນ, ຜູ້ຊີ້ນຳວຽກງານເສດຖະກິດ, ທ່ານ ທອງປະເສີດ ໄຊຍະລາດ ຫົວໜ້າພະແນກການເງິນແຂວງ, ມີບັນດາກົມກອງ, ພະແນກການ,

ຫ້ອງການການເງິນ 5 ເມືອງ ແລະ ພະນັກງານພາກສ່ວນກ່ຽວຂ້ອງເຂົ້າຮ່ວມ.ໃນກອງປະຊຸມ,​ ທ່ານ ແສງຈັນ ປະເສີດກຸນ ຮອງພະແນກການເງິນແຂວງ ໄດ້ລາຍງານວ່າ: ໃນໄລຍະ 1 ປີຜ່ານມາ ພະແນກການເງິນແຂວງໄຊສົມບູນ ໄດ້ເອົາໃສ່ຈັດຕັ້ງປະຕິບັດແຜນງົບປະມານປະຈຳປີ 2021 ຢ່າງຕັ້ງໜ້າໂດຍສະເພາະແມ່ນສຸມໃສ່ຈັດຕັ້ງປະຕິບັດດຳລັດເລກທີ 414/ລບ ແລະ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເພື່ອເຮັດໃຫ້ການຈັດເກັບລາຍຮັບ ແລະ ຄຸ້ມຄອງລາຍຈ່າຍໃຫ້ບັນລຸຕາມແຜນການ, ຖືກຕ້ອງຕາມລະບຽບກົດໝາຍ.

ໃນນັ້ນ, ສາມາດຈັດຕັ້ງປະຕິບັດຈັດເກັບລາຍຮັບບັນລຸໄດ້ 613,90 ຕື້ກີບ, ເທົ່າກັບ 156,50%, ເກີນແຜນ 221,62 ຕື້ກີບ ເທົ່າກັບ 56,50%; ການຄຸ້ມຄອງລາຍຈ່າຍສາມາດຈັດຕັ້ງປະຕິບັດໄດ້ 436,97 ຕື້ກີບ, ເທົ່າກັບ 97,89%, ຈັດແບ່ງຂັ້ນຄຸ້ມຄອງໃຫ້ບັນດາເມືອງ, ຕິດຕາມ, ກວດກາ ການຈັດເກັບລາຍຮັບ-ລາຍຈ່າຍດ້ວຍລະບົບ TaxRis ແລະ ຜ່ານລະບົບທະນາຄານ (GFIS).

ໃນກອງປະຊຸມຍັງໄດ້ຮັບຟັງ ຄຳສັ່ງ, ຄຳແນະນຳຂອງທ່ານເຈົ້າແຂວງໄຊສົມບູນ ວ່າດ້ວຍການເພີ່ມທະວີຄຸ້ມຄອງ, ຕ້ານການຮົ່ວໄຫຼລາຍຮັບງົບປະມານແຫ່ງລັດ ແລະ ຈັດຕັ້ງປະຕິບັດແຜ່ນງົບປະມານແຫ່ງລັດຂອງແຂວງ ປະຈຳປີ 2022, ໂອກາດດຽວກັນນີ້ ຜູ້ເຂົ້າຮ່ວມກອງປະຊຸມ ຍັງໄດ້ພ້ອມກັນປະກອບຄຳຄິດເຫັນໃສ່ບົດສະຫຼຸບຢ່າງກົງໄປກົງມາ ເພື່ອເຮັດໃຫ້ການຈັດຕັ້ງປະຕິບັດໃນຕໍ່ໜ້າໃຫ້ໄດ້ຮັບປະສິດທິຜົນສູງ. ພ້ອມນັ້ນກອງປະຊຸມຍັງໄດ້ເຊັນບົດບັນທຶກ ແລະ ມອບໃບຍ້ອງຍໍໃຫ້ກັບບັນດາເມືອງ,

ພະແນກການທີ່ສ້າງລາຍຮັບເກີນແຜນ.ຕອນທ້າຍ ທ່ານ ສຸກສະຫວາດ ວົງພູມເຫຼັກ ໄດ້ໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະ 1 ປີຜ່ານມາ ພ້ອມທັງເນັ້ນໜັກບາງວຽກງານທີ່ເປັນຈຸດສຸມຄື: ເອົາໃຈໃສ່ສຶກສາອົບຮົມການເມືອງແນວຄິດໃຫ້ກັບສະມາຊິກພັກ, ພະນັກງານ, ແບ່ງວຽກ,

ແບ່ງຄວາມຮັບຜິດຊອບຈະແຈ້ງ ແນ່ໃສ່ສ້າງພະນັກງານຫັນເປັນທັນສະໄໝ, ຜັນຂະຫຍາຍນິຕິກໍາຂອງກະຊວງການເງິນ ກໍຄືຄໍາສັ່ງແນະນໍາຂອງທ່ານເຈົ້າແຂວງ ເພື່ອຊຸກຍູ້ດ້ານລາຍຮັບ ແລະ ຄຸ້ມຄອງລາຍຈ່າຍ ຕ້ອງໄດ້ປັບປຸງກົນໄກບໍລິຫານ, ກົນໄກຈັດເກັບລາຍຮັບ,

ຄຸ້ມຄອງລາຍຈ່າຍ ແລະ ຕ້ານການຮົ່ວໄຫຼງົບປະມານແຫ່ງລັດແບບໃໝ່ດ້ວຍລະບົບ TaxRis ໃຫ້ເຂັ້ມງວດ ເພື່ອໃຫ້ຖືກຕ້ອງສອດຄ່ອງກັບລະບຽບກົດໝາຍທີ່ສະພາຮັບຮອງ, ພ້ອມນັ້ນຕ້ອງເອົາໃຈໃສ່ຄົ້ນຄວ້າ,

ຊອກຫາບັນດາແຫຼ່ງລາຍຮັບບົ່ມຊ້ອນທີ່ເກີດຂຶ້ນໃໝ່ຢູ່ຕາມບັນດາພະແນກການ, ຫັນການຄຸ້ມຄອງແບບໃໝ່ໃຫ້ແກ່ສວຍສາອາກອນບັນດາເມືອງທີ່ມີເງື່ອນໄຂ ພ້ອມທັງຊຸກຍູ້, ຕິດຕາມ, ກວດກາ ການຈັດເກັບລາຍຮັບໃຫ້ບັນລຸໄດ້ 90% ຂຶ້ນໄປ.

ທັງນີ້, ກໍແນ່ໃສ່ສ້າງຄວາມໝັ້ນທ່ຽງໃຫ້ແກ່ການເງິນຂອງລັດ ເວົ້າລວມ, ເວົ້າສະເພາະແມ່ນແຂວງໄຊສົມບູນ ໃຫ້ນັບມື້ນັບສູງຂຶ້ນ ຍູ້ແຮງການພັດທະນາແຂວງໄຊສົມບູນ ໃຫ້ຈະເລີນກ້າວໜ້າຕາມທິດທາງຂອງພັກ-ລັດກຳນົດ.

ຂ່າວ-ພາບ: ປກສ ແຂວງໄຊສົມບູນ

Related Posts

Leave a Reply

Your email address will not be published. Required fields are marked *