ກົມລ້ຽງສັດ ແລະ ການປະມົງ ມອບງົວແມ່ພັນໃຫ້ 2​ ຟາມ​ ຢູ່ແຂວງໄຊຍະບູລີ

ກົມລ້ຽງສັດ ແລະ ການປະມົງ ມອບງົວແມ່ພັນໃຫ້ 2​ ຟາມ​ ຢູ່ແຂວງໄຊຍະບູລີ ພ້ອມກຳນົດເງື່ອນໄຂໃນການລ້ຽງ.​ກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ ໄດ້ມອບງົວແມ່ພັນ ຈໍານວນ 20 ໂຕ ໃຫ້ຟາມງົວຂອງທ່ານ ສະໄໝ ສຸກກະເສີມ ແລະ ຟາມງົວຂອງທ່ານ ຫຸມພັນ ສອນສຸພາບ ຈໍານວນ 10 ໂຕ.

ພິທີ ມອບ-ຮັບງົວແມ່ພັນ ລະຫວ່າງກົມລ້ຽງສັດ ແລະ ການປະມົງ ກັບ ທ່ານ ສະໄໝ ສຸກກະເສີມ ແລະ ທ່ານ ຫຸມພັນ ສອນສຸພາບ ໄດ້ຈັດຂຶ້ນໃນວັນທີ 26 ມັງກອນ 2022 ນີ້, ຢູ່ທີ່ຟາມງົວ SKS ຂອງທ່ານ ສະໄໝ ສຸກກະເສີມ ບ້ານບຸ່ງຄ້າ ເມືອງແກ່ນທ້າວ ແຂວງໄຊຍະບູລີ​ ໂດຍການເປັນກຽດເຂົ້າຮ່ວມຂອງ​ ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ,

ທ່ານ ຄໍາສອນ ສີສະອາດ ຫົວໜ້າພະແນກລ້ຽງສັດ ກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້, ທ່ານ ຄໍາເກີ່ງ ພັນລັກ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງໄຊຍະບູລີ, ມີທີ່ປຶກສາໂຄງການ, ທີມງານຂອງກົມ, ຮອງຫົວໜ້າຫ້ອງການກະສິກໍາ ແລະ ປ່າໄມ້ເມືອງ ແລະ ບັນດາກຸ່ມລ້ຽງສັດຢູ່ພາຍໃນເມືອງແກ່ນທ້າວເຂົ້າຮ່ວມຢ່າງພ້ອມພຽງ.

ງົວແມ່ພັນທີ່ນໍາມາມອບໃນຄັ້ງນີ້, ໄດ້ຮັບການສະໜັບສະໜູນ ຈາກໂຄງການພັດທະນາພື້ນຖານໂຄງລ່າງ ດ້ານກະສິກໍາ ໃນ ສປປ ລາວ ຮ່ວມມື ລາວ-ຮົງກາລີ ເປັນຊັບສິນຂອງລັດ ທີ່ມີຈຸດປະສົງມອບໃຫ້ຜູ້ທີ່ມີເງື່ອນໄຂນໍາໄປລ້ຽງ ໃຫ້ເປັນແນວພັນຕັ້ງຕົ້ນ ໂດຍມີຫຼັກການຄື:

ພາຍໃນ 3 ປີ ຝ່າຍທີ່ໄດ້ຮັບງົວແມ່ພັນ ຕ້ອງສົ່ງລູກງົວໂຕທໍາອິດ ອາຍຸຄົບ 1 ປີ ຕໍ່ແມ່ງົວ 1 ໂຕ ຄືນໃຫ້ຝ່າຍມອບ, ລູກງົວໂຕຕໍ່ໄປແມ່ນມອບໃຫ້ຝ່າຍຮັບ, ສ່ວນແມ່ງົວແມ່ນໃຫ້ຂະຫຍາຍພັນຕໍ່ໄປຈົນຮອດ 5 ປີ ຖ້າຫາກເຮັດໃຫ້ງົວຕາຍໂດຍຕັ້ງໃຈ ຫຼື ບໍ່ຕັ້ງໃຈ ຕ້ອງໃຊ້ຄ່າເສຍຫາຍເປັນເງິນ 25 ລ້ານກີບ/ໂຕ.

ໃນກໍລະນີ ສັດເຈັບປ່ວຍເຖິງແກ່ຄວາມຕາຍ ໂດຍຝ່າຍຮັບບໍ່ໄດ້ແຈ້ງ ໃຫ້ຝ່າຍມອບຮັບຊາບ ຕ້ອງຮັບຜິດຊອບ ແຕ່ຖ້າມີການລາຍງານ ສະພາບການເຈັບປ່ວຍຂອງສັດ ຈະພິລະນາເປັນເປັນແຕ່ລະກໍນີ.

ຂ່າວ: ຫ້ອງການ ຖວທ ເມືອງແກ່ນທ້າວ

Related Posts

Leave a Reply

Your email address will not be published.