ຄະນະສະເພາະກິດຮຽກຮ້ອງປີໃໝ່ນີ້ ຫ້າມຈັດງານຊຸມແຊວ, ສ້າງສັນດ້ວຍຮູບແບບຕ່າງໆຢ່າງເດັນຂາດ

ຄະນະສະເພາະກິດຮຽກຮ້ອງປີໃໝ່ນີ້ ຫ້າມຈັດງານຊຸມແຊວ, ສ້າງສັນດ້ວຍຮູບແບບຕ່າງໆຢ່າງເດັນຂາດ

ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ກ່າວໃນພິທີຖະແຫຼງຂ່າວປະຈຳວັນທີ 25 ທັນວາ 2021 ວ່າ: ອີກ 6 ວັນ ກໍຈະຮອດວັນສົ່ງທ້າຍປີເກົ່າ ແລະ ຕ້ອນຮັບປີໃໝ່ 2022 ແລ້ວ ແລະ ມາຮອດປະຈຸບັນເຖີງວ່າໂຄວິດ-19 ສາຍພັນ “omicron” ຍັງບໍ່ທັນພົບຢູ່ໃນປະເທດລາວ ແຕ່ບັນດາປະເທດໃກ້ຄຽງແມ່ນໄດ້ມີລາຍງານພົບສາຍພັນດັ່ງກ່າວໃນນັກທ່ອງທ່ຽວ ກໍ່ຄືຜູ້ຄົນທີ່ເດີນທາງກັບມາຈາກເຂດສ່ຽງ.

ດັ່ງທີ່ພວກເຮົາຮັບຮູ້ແຕ່ລະວັນຈຳນວນຕົວເລກຕິດເຊື້ອຂອງໂຄວິດ-19 ຊຶ່ງມີສາເຫດຈາກສາຍພັນເດວຕ້າຍັງແຜ່ລະບາດໃນຫຼາຍແຂວງ ແລະ ສູງກວ່າໝູ່ແມ່ນຢູ່ນະຄອນຫຼວງວຽງຈັນ. ດັ່ງນັ້ນ, ຄະນະສະພາະກິດ ຈຶ່ງຮຽກຮ້ອງມາຍັງປະຊາຊົນ, ພະນັກງານ, ກຳລັງປະກອບອາວຸດ ແລະ ທຸກພາກສ່ວນໃນສັງຄົມ ແລະ ລວມທັງຄົນຕ່າງປະເທດທີ່ດຳລົງຊີວິດ ແລະ ເຮັດວຽກຢູ່ ສປປລາວ ຕ້ອງໄດ້ປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ເລກທີ 1684/ຫສນຍ, ລົງວັນທີ 23 ທັນວາ 2021 ແມ່ນໃຫ້ສືບຕໍ່ປະຕິບັດແຈ້ງການສະບັບເລກທີ 1494/ຫສນຍ, ລົງວັນທີ 14 ພະຈິກ 2021 ຢ່າງເຂັ້ມງວດໂດຍສະເພາະຫ້າມການຈັດງານຊຸມແຊວ, ເຕົ້າໂຮມ ແລະ ຈັດກິດຈະກຳສ້າງສັນດ້ວຍຮູບການຕ່າງໆ ພ້ອມທັງບໍ່ໃຫ້ອົງການຈັດຕັ້ງພັກ-ລັດທຸກຂັ້ນຈັດການສະເຫຼີມສະຫຼອງຢ່າງເດັດຂາດ.

ໃນຕົ້ນປີ 2022 ສປປ ລາວ ກໍ່ຈະເປີດປະເທດສຳລັບຮັບນັກທ່ອງທ່ຽວເຂົ້າມາໃນເຂດສີຂຽວ ດັ່ງນັ້ນພວກເຮົາຕ້ອງພ້ອມພາກັນຕັດສິນໃຈເດັດຂາດປະຕິບັດມາດຕະການປ້ອງກັນຢ່າງເຄັ່ງຂັດໃນໄລຍະຊ່ວງເວລາທີ່ຍັງເຫຼືອຂອງປີ 2021 ເພື່ອເຮັດແນວໃດດຶງເອົາຕົວເລກຕິດເຊື້ອທົ່ວປະເທດ ກໍ່ຄືຂອງນະຄອນຫຼວງວຽງຈັນ ລົງໄວເທົ່າທີ່ໄວໄດ້, ເພາະຖ້າພວກເຮົາຫາກເມີນເສີຍ ແລະ ຍັງລະເມີດແຈ້ງການດັ່າງກ່າວ ກໍ່ຈະເຮັດໃຫ້ສະພາບການລະບາດທີ່ພວກເຮົາກຳລັງປະເສີນໜ້າໃນປະຈຸບັນຈະຍັງສືບຕໍ່ສູງໃນລະດັບ 4 ຕົວເລກ ແລະ ຖ້າຫາກສາຍພັນ omicron ຫາກສາມາດຫຼຸດເຂົ້າມາແຜ່ລະບາດໃນຊຸມຊົນຂອງພວກເຮົາ ເຊິ່ງກໍ່ຈະເຮັດໃຫ້ສະພາບການລະບາດຂອງປະເທດເຮົາຍິ່ງຮ້າຍແຮງ ແລະ ໜັກໜ່ວງກ່ວາເກົ່າ ແລະ ສະພາບດັ່ງກ່າວແມ່ນຫຼາຍປະເທດໃນຢູໂຣບ ແລະ ທະວີບອາເມລິກາ ກຳລັງປະເຊີນໜ້າໜັກໃນປະຈຸບັນ. ດັ່ງນັ້ນ, ທ່າອ່ຽງຂອງການລະບາດຂອງພະຍາດໂຄວິດຈະຂຶ້ນລົງ ແມ່ນຂຶ້ນນຳທຸກພາກສ່ວນໃນສັງຄົມທີ່ຈະປະຕິບັດຕົນເອງແນວໃດ ເພື່ອບໍ່ໃຫ້ການລະບາດແກ່ຍາວ.

Related Posts

Leave a Reply

Your email address will not be published.