ສັງຄົມໃຫ້ຄວາມສົນໃຈວ່າ ເປັນຫຍັງລາຄາປີ້ລົດໄຟຄືແພງແທ້

ສັງຄົມໃຫ້ຄວາມສົນໃຈວ່າ ເປັນຫຍັງລາຄາປີ້ລົດໄຟຄືແພງແທ້ ໄດ້ມີບາງຂໍ້ມູນ ກ່ຽວກັບລົດໄຟ ລາວ-ຈີນ ມາສະເໜີໃຫ້ຮູ້

ຂປລ. ລົດໄຟລາວ-ຈີນ ເປັນລົດໄຟລາງດ່ຽວແລ່ນໄດ້ເຖິງ 140km/h ໂດຍສະເລ່ຍ (ເວົ້າສະ ເພາະປະເທດລາວ, ແຕ່ຢູ່ ສປ ຈີນ ແລ່ນໄດ້ເຖິງ 200km/h) ຂະນະທີ່ລົດໄຟທົ່ວໄປຢູ່ປະເທດໄທ, ຫວຽດນາມ, ຈີນ ແລ່ນປະມານ 48-95km/h.

ລົດໄຟລາວ-ຈີນ ໃຊ້ເວລາກໍ່ສ້າງ 5 ປີ (25/12/2016-3/12/2021) ດ້ວຍຄວາມຍາວ 422.4km (ສະເພາະໃນປະເທດລາວ), ເຊິ່ງລົດໄຟໂດຍສານ ແລະ ລົດໄຟຂົນສົ່ງສິນຄ້າແມ່ນແຍກກັນ ແລະ ໄດ້ເປີດບໍລິການກ່ອນ 6 ສະຖານີ ຄື: ນະ ຄອນຫລວງວຽງຈັນ, ໂພນໂຮງ, ວັງວຽງ, ຫລວງພະບາງ, ເມືອງໄຊ ແລະ ສະຖານີບໍ່ເຕ່ນ. ໄລຍະນີ້, ຍ້ອນການແຜ່ລະບາດຂອງໂຄວິດ-19 ຈຶ່ງບໍ່ທັນມີຖ້ຽວລົດໄຟເດີນທາງລະຫວ່າງປະເທດເທື່ອ.

EMU ຫລື ອີ-ເອັມ-ຢູ (Electric Multiple Unit) ບໍ່ແມ່ນອີ່ມູ ທີ່ແປວ່ານົກທີ່ໜ້າຕາຄ້າຍນົກກະຈອກເທດ. ລົດໄຟຮຸ່ນ EMU ທັງ 2 ຄັນ ທີ່ມາລາວ ແມ່ນມີຊື່ວ່າຂະບວນລ້ານຊ້າງ ແລະ ຂະບວນແຄນລາວ ໂດຍລົດໄຟ ມີຫົວຢູ່ 2 ສົ້ນ. ສະນັ້ນ, ມັນບໍ່ຈຳເປັນຕ້ອງໂຄ້ງກັບເວລາຈະຂັບກັບ ພຽງແຕ່ໄປຍ້າຍບ່ອນຂັບຈາກສົ້ນໜຶ່ງໄປຫາສົ້ນໜຶ່ງ, ຢູ່ພາຍໃນລົດໄຟມີປັກສຽບ, ຫລີ້ນອິນເຕີເນັດໄດ້ (ອີງຕາມສັນຍານໃນພື້ນທີ່). ລົດໄຟ EMU ແບ່ງເປັນ 2 ລາຄາ ຄື: ຊັ້ນ 1, ຊັ້ນ 2 ເປັນຂະບວນດຽວກັນ ຮອດພ້ອມກັນ, ຕ່າງແຕ່ວ່າຊັ້ນ 1 ກວ້າງຂວາງກວ່າ,

ແຕ່ຊັ້ນ 2 ກໍກວ້າງພຽງພໍ ສາມາດນັ່ງຢຽດໄດ້ເກືອບສຸດຂາ, ມີຫ້ອງນໍ້າ, ມີປັກສຽບ ແລະ ມີແອຄືກັນ. ເດັກທີ່ມີສ່ວນສູງຕ່ຳກວ່າ 120 cm ບໍ່ໄດ້ຊື້ປີ້ ແຕ່ຜູ້ປົກຄອງສາມາດພາໄປນຳໄດ້ພຽງ 1 ຄົນ, ຖ້າເກີນ 1 ຄົນ ຈະຄິດໄລ່ລາຄາ. ພ້ອມກັນນີ້, ສຳພາລະທີ່ຖືຂຶ້ນໄດ້ ມີນ້ຳໜັກບໍ່ກາຍ 20kg.

ຄຳຖາມທີ່ສັງຄົມສ່ວນຫລາຍຖົກຖຽງກັນວ່າ: ເປັນຫຍັງລາຄາປີ້ລົດໄຟຄືແພງແທ້? ອີງຕາມໃບສະເໜີ ອະນຸມັດຮັບຮອງລາຄາມາດຖານປີ້ຂົນສົ່ງໂດຍສານ ແລະ ລາຍງານລາຄາຂົນສົ່ງສິນຄ້າ ທາງລົດໄຟລາວ-ຈີນ 1266/LCR2021 ລົງວັນທີ 23/11/2021 ຄິດວ່າບໍ່ຖືກ ແລະ ກໍບໍ່ແພງເກີນຄວາມເປັນຈິງ ເພາະລົດໄຟຟ້າມີຕົ້ນທຶນ ແລະ ຄ່າບູລະນະສູງ.

ເນື່ອງຈາກວ່າ ລາຄາຖືກກຳນົດມາຈາກເງິນ ຢວນຄື ປີ້ໂດຍສານຢູ່ປະມານ 0,32-0,45 ຢວນ/ຄົນ/km ແລະ ລາຄາຂົນສົ່ງສິນຄ້າ 0,5-0,6ຢວນ/ໂຕນ/ກມ (ລາຄາແມ່ນຂຶ້ນກັບອັດຕາແລກປ່ຽນເງິນຕາ ຄິດໄລ່ດ້ວຍເຣດປັດຈຸບັນ 1 ຢວນ=1.800 ກີບ), ເຊິ່ງລາຄານີ້ແມ່ນຖືກອະນຸມັດຮັບຮອງໃຫ້ນຳໃຊ້ຊົ່ວຄາວ ແຕ່ລາຄາຈະປັບຂຶ້ນ ຫລື ລົງໄດ້ບໍ່ເກີນ 20-30% ແລະ ໃນລາຄາປີ້ຕ້ອງຖືກບວກເພີ່ມຄ່າປະກັນໄພ 2 ຢວນ/ຄົນ.

ສ່ວນຕົ້ນທຶນການໂດຍ ສານຢູ່ປະມານ 1,64 ຢວນ/ຄົນ/km ທີ່ແພງກໍຍ້ອນການເປີດບໍລິການໄລຍະທຳອິດ ເນື່ອງຈາກມີຜູ້ ໂດຍສານໜ້ອຍ, ຄ່າຫລຸ້ຍຫ້ຽນ ແລະ ຄ່າດອກເບ້ຍເງິນກູ້ ຂ້ອນຂ້າງສູງ ແຕ່ຫາກຜ່ານໄປໄລຍະໜຶ່ງຫາກມີຖ້ຽວລົດ ແລະ ຜູ້ໂດຍສານຫລາຍຂຶ້ນ ຕົ້ນທຶນສະເລ່ຍຕໍ່ຫົວຄົນກໍຈະຖືກລົງ.

ສຳລັບການກຳນົດເວລາຂາຍປີ້ລົດໄຟລາວ-ຈີນ ນະຄອນຫລວງວຽງຈັນ-ບໍ່ເຕ່ນ (ຂາຍປີ້ເລີ່ມ 7:00-10:00 ໂມງ ທຸກມື້); ນະຄອນຫລວງວຽງຈັນ-ຫລວງພະບາງ (ຂາຍປີ້ 14:00-16:00 ໂມງທຸກມື້), ເຊິ່ງໄລຍະນີ້ ຍັງບໍ່ມີການຂາຍປີ້ທາງອອນລາຍເທື່ອ.

ສ່ວນຕາຕະລາງການອອກລົດ ນະຄອນ ຫລວງວຽງຈັນ-ບໍ່ເຕ່ນ 1 ຖ້ຽວ (ໄປ-ກັບ) ແລະ ນະຄອນຫລວງວຽງຈັນ-ຫລວງພະບາງ 1 ຖ້ຽວ (ໄປ-ກັບ).

ເວລາເດີນລົດ 8:00 ໂມງ ລົດໄຟອອກຈາກສະຖານີນະຄອນຫລວງວຽງຈັນ-ບໍ່ເຕ່ນ ແລະ ກັບແຕ່ສະຖານີບໍ່ເຕ່ນ-ສະຖານີນະຄອນຫລວງວຽງຈັນ ເວລາ 12.00 ໂມງ; ເວລາ 15:44 ໂມງ ນະຄອນຫລວງວຽງຈັນ-ຫລວງພະບາງ ແລະ ກັບຈາກຫລວງພະບາງ-ນະຄອນຫລວງວຽງຈັນ ເວລາ 18:16 ໂມງ.

ສະຖານີລົດໄຟ ນະຄອນຫລວງວຽງຈັນ ຕັ້ງຢູ່ເສັ້ນທາງ 450 ປີ ຖ້າມາແຕ່ທາງດົງໂດກຈະເຫັນຮ້ານຂາຍເຄື່ອງ CSC ແລ້ວລ້ຽວຊ້າຍເຂົ້າໄປປະມານ 3Km.

ຂໍ້ມູນ: ລົດໄຟລາວ-ຈີນ

Related Posts

Leave a Reply

Your email address will not be published.