ຂ່າວດີ! ເມືອງນ້ຳບາກ ປິ່ນປົວຜູ້ຕິດເຊື້ອພະຍາດ ໂ ຄ ວິ ດ ຫາຍດີແລ້ວ 140 ຄົນ

ຂ່າວດີເມືອງນ້ຳບາກ ປິ່ນປົວຜູ້ຕິດເຊື້ອພະຍາດໂຄວິດ-19 ຫາຍດີແລ້ວ 140 ຄົນ

ວັນທີ 18 ຕຸລາ 2021ນີ້ ຄະນະສະເພາະກິດ ເພື່ອປ້ອງກັນ, ຄອບຄຸມ, ສະກັດກັ້ນ ແລະແກ້ໄຂການລະບາດພະຍາດໂຄວິດ-19 ເມືອງນ້ຳບາກ ໄດ້ມອບໃບຢັ້ງຢືນການປິ່ນປົວ ແລະອານຸຍາດໃຫ້ຜູ້ຕິດພະຍາດໂຄວິດ-19 ປີ່ນປົວຫາຍດີແລ້ວ ອອກຈາກໂຮງຫມໍພາກສະໜາມຂອງເມືອງ ໂດຍການເຂົ້າຮ່ວມຂອງ ທ່ານ ບຸນທັນ ຈັນທະສັກ ຮອງເຈົ້າເມືອງນ້ຳບາກ ຫົວໜ້າຄະນະສະເພາະກິດຂອງເມືອງ,

ທ່ານ ດຣ ສົມພອນ ພົມມະລັດ ຮອງຫົວໜ້າຫ້ອງການສາທາລະນະສຸກເມືອງ, ທ່ານ ດຣ ເນັ່ງຊົ່ງ ເຢ່ນຕູ່ ອຳນວຍການໂຮງຫມໍເມືອງ.

ໃນໂອກາດນີ້ ທ່ານ ດຣ ນາງ ແສງທອງ ຮອງຫົວໜ້າຫ້ອງການສາທາລະນະສຸກເມືອງ ຜູ້ຮັບຜິດຊອບໂຮງຫມໍພາກສະຫນາມ ເມືອງນ້ຳບາກ ໄດ້ແນະນຳການສືບຕໍ່ປ້ອງກັນຕົນເອງ, ປ້ອງກັນຄົນໃນສັງຄົມ ພາຍຫຼັງໄດ້ຮັບການອະນຸຍາດໃຫ້ຜູ້ຕິດເຊື້ອໂຄວິດ-19 ທີ່ປີ່ນປົວຫາຍດີແລ້ວ ໃຫ້ອອກຈາກໂຮງຫມໍພາກສະໜາມ ເພື່ອສືບຕໍ່ຈຳກັດຕົນເອງຢູ່ເຮືອນອີກ 7 ວັນ.

ເຊີ່ງໄດ້ຮັບການຢັ້ງຢືນຈາກຄະນະສະເພາະກິດເມືອງ ແລະ ຕາມຫຼັກການປີ່ນປົວຂອງແພດ. ຕ້ອງສືບຕໍ່ໃຊ້ຊີວິດແບບໃຫມ່, ໃສ່ຜ້າອັດປາກ-ອັດດັງ ໃນເວລາອອກຈາກເຮືອນໃນຄວາມຈຳເປັນ, ຮັກສາໄລຍະຫ່າງຈາກຄົນອື່ນ 2 ແມັດ, ຫມັ່ນລ້າງມືໃສ່ສະບູ, ນ້ຳສະອາດ ຫຼື ເຈວລ້າງມືທີ່ມີສວ່ນປະສົມຂອງເຫຼົ້າ 70 ຫາ 90 % ເວລາຈັບສິ່ງຂອງຕ່າງໆ, ພັກຜ່ອນໃຫ້ພຽງພໍ.

ຕັ້ງແຕ່ມີການລະບາດເຊື້ອພະຍາດໂຄວິດ-19 ຢູ່ເມືອງນ້ຳບາກ ມາແຕ່ທ້າຍເດືອນກັນຍາ 2021 ມາຮອດປັດຈຸບັນ ເມືອງນ້ຳບາກ ມີຜູ້ທີ່ຕິດເຊື້ອສະສົມ ທັງໝົດ 335 ຄົນ, ປີ່ນປົວຫາຍດີແລ້ວ 140 ຄົນ; ໃນນັ້ນມີພະນັກງານແພດ, ແຮງງານສວນກວ້ຍບ້ານນະຄອນ ແລະຜູ້ສຳພັດໃກ້ຊິດກັບແພດຫມໍຈຳນວນໜື່ງ, ບໍ່ມີກໍລະນີເສຍຊີວິດ ແລະ ຍັງສືບຕໍ່ປີ່ນປົວ 200 ຄົນ ຢູ່ໂຮງຫມໍພາກສະຫນາມ 3 ແຫ່ງຂອງເມືອງຄື: ໂຮງຫມໍພາກສະຫນາມ ມັດທະຍົມສົມບູນນ້ຳບາກ, ໂຮງຫມໍພາກສະຫນາມ ຫໍພັກແພດ ແລະໂຮງຫມໍພາກສະຫນາມສະໂມສອນໃຫຍ່ຂອງເມືອງ.

ຂ່າວ: ນັກຂ່າວເມືອງນ້ຳບາກ

Related Posts

Leave a Reply

Your email address will not be published.