ພາກພູມໃຈ ຄັ້ງປະຫວັດສາດ ທີ່ມີສີສັນງົດງາມ ແລະ ພັດທະນາຕາມສີຂອງທຸງຊາດຂອງ ສ.ປ.ປ.ລາວ

ຂະບວນລົດໄຟ “ລ້ານຊ້າງ”​ ເຊິ່ງເປັນຂະບວນລົດໄຟໂດຍສານ ຄັ້ງປະຫວັດສາດ ທີ່ມີສີສັນງົດງາມ ແລະ ພັດທະນາຕາມສີຂອງທຸງຊາດຂອງ ສ.ປ.ປ.ລາວ ທີ່ປະກອບມີ:ສີແດງ,​ ສີຟ້າ ແລະ ສີຂາວ ໄດ້ມາຮອດນະຄອນຫລວງວຽງຈັນແລ້ວ ໃນຕອນເຊົ້າວັນທີ 16 ຕຸລາ 2021 ນີ້,​ ໂດຍມີ ທ່ານ ວຽງສະຫວັດ ສີພັນດອນ ລັດຖະມົນຕີກະຊວງ ໂຍທາທິການ ແລະ ຂົນສົ່ງ ພ້ອມດ້ວຍການນຳຈາກບັນດາກະຊວງທີ່ກ່ຽວຂ້ອງອອກຕ້ອນຮັບຢ່າງສົມກຽດ ຢູ່ທີ່ສະຖານີ ຜູ້ໂດຍສານ ບ້ານໄຊ,​ ເມືອງ ໄຊທານີ,​ ນະຄອນຫລວງວຽງຈັນ.

ຕາມກຳນົດໝາຍຂອງ ລັດຖະບານ ແລ້ວ,​ ເສັ້ນທາງລົດໄຟ ລາວ-ຈີນ ຈະມີກຳນົດເປີດການນຳໃຊ້ ແລະ ແລ່ນຮັບໃຊ້ມວນຊົນ ຢ່າງເປັນທາງການໃນວັນທີ 2 ທັນວາ 2021 ທີ່ຈະມາເຖິງນີ້ ພໍດີກົງກັບວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 46 ປີ.​ພາຍຫລັງເປີດການນຳໃຊ້ຢ່າງເປັນທາງການ ຂະບວນລົດໄຟ ລາວ-ຈີນ ຈະບໍລິການຮັບໃຊ້ຜູ້ໂດຍສານ ແລະ ສິນຄ້າ ລະຫວ່າງ ສ.ປ.ປ.ລາວ ແລະ ສ.ປ ຈີນ.​ ພ້ອມກັນນີ້,​ ຍັງເປັນເສັ້ນທາງລົດໄຟເຊື່ອມຕໍ່ຢູ່ໃນອະນຸພາກພື້ນຕື່ມອີກ.

ໂຄງການທາງລົດໄຟ ລາວ-ຈີນ ນອກຈາກຈະເປັນຂະບວນລົດໄຟເພື່ອຂົນສົ່ງຜູ້ໂດຍສານ ແລະ ສິນຄ້າແລ້ວ,​ ຍັງເປັນໂຄງການທີ່ມີຄວາມໝາຍ ຄວາມສຳຄັນ ທີ່ສະແດງເຖິງຄວາມສາມັກຄີແບບຍຸດທະສາດລະຫວ່າງ ສອງພັກ-ສອງລັດ ກໍ່ຄືປະຊາຊົນສອງຊາດ ລາວ-ຈີນ ທີ່ມີມາຢ່າງຍາວນານຕື່ມອີກ ແລະ ເປັນການເປີດສັກກະລາດໃໝ່ ແຫ່ງການເຊື່ອມໂຍງດ້ານການຄ້າ,​ ການຂົນສົ່ງ ຂອງ ສ.ປ.ປ.ລາວ ກັບບັນດາປະເທດເພື່ອນບ້ານ,​ ອະນຸພາກພື້ນ ແລະ ສາກົນ ເຊິ່ງເປັນປະເທດດຽວໃນ ອາຊຽນ ທີ່ບໍ່ມີຊາຍແດນຕິດຈອດກັບທະເລ.

ຂໍຂອບໃຈຮູບພາບຈາກ : KAi Kaikeo Saiyasaneຂໍຂອບໃຈເນື້ອໃນຂ່າວໂດຍ ​: ຄຳແສງ ແກ້ວປະເສີດ,​ ທີ່ມາ,​ ສູນຂ່າວພະລັງງານ ແລະ​ ບໍ່ແຮ່.

Related Posts

Leave a Reply

Your email address will not be published.