ທ່ານລັດຖະມົນຕີກະຊວງ ອຄ ລົງຊຸກຍູ້ ຕິດຕາມ ລາຄາສິນຄ້າ ແລະ ມາດຕະການປ້ອງກັນພະຍາດໂຄວິດ-19 ໃນຕະຫຼາດ

ທ່ານລັດຖະມົນຕີກະຊວງ ອຄ ລົງຊຸກຍູ້ ຕິດຕາມ ລາຄາສິນຄ້າ ແລະ ມາດຕະການປ້ອງກັນພະຍາດໂຄວິດ-19 ໃນຕະຫຼາດ

ໃນວັນທີ 6 ຕຸລາ 2021 ທ່ານ ຄໍາແພງ ໄຊສົມແພງ ລັດຖະມົນຕີກະຊວງ ອຄ ພ້ອມຄະນະລົງເຮັດວຽກຢູ່ພະແນກ ອຄ.ນວ, ໂຮງງານຕັດຫຍິບ ໄຮ-ເທັກ ລາວ ແອບພາເຣວ ຈໍາກັດ ແລະ ຕະຫຼາດ ໂນນຄໍ້ ເພື່ອຕິດຕາມ ແລະ ຊຸກຍູ້ໃນການຄຸ້ມຄອງລາຄາສິນຄ້າ, ມາດຕະການປ້ອງກັນພະຍາດໂຄວິດ-19 ພາຍໃນຕະຫຼາດ ແລະ ໂຮງງານອຸດສາຫະກຳຕັດຫຍິບ.

ໂອກາດດັ່ງກ່າວ ທ່ານ ນາງ ວັນມະນີ ພິມມະສານ ຫົວໜ້າພະແນກ ອຄ.ນວ ໄດ້ລາຍງານສະພາບການຄຸ້ມຄອງ ແລະ ຕິດຕາມລາຄາສິນຄ້າໃນໄລຍະຜ່ານມາໃຫ້ຮູ້ວ່າ: ​ວຽກງານການຄຸ້ມຄອງ ຕິດຕາມຂົງເຂດຫົວໜ່ວຍທຸລະກິດ ໃນໄລຍະການແຜ່ລະບາດຂອງພະຍາດໂຄວິດ-19 ໂດຍໄດ້ແຕ່ງເຈົ້າໜ້າທີ່ເປັນ 3 ຈຸລົງກວດກາແຕ່ລະວັນ, ການປະເມີນການປະຕິບັດໄລຍະວັນທີ 15-30 ກັນຍາ 2021

ເຈົ້າຂອງທຸລະກິດສ່ວນໃຫຍ່ໃຫ້ການຮ່ວມມືໃນການປິດ – ເປີດກິດຈະການ, ມີສ່ວນໜ້ອຍທີ່ຍັງບໍ່ທັນເຂົ້າໃຈ ຍັງເປີດຮ້ານປົກ​ກະຕິ, ຄະນະສະເພາະກິດໄດ້ເຮັດບົດບັນທຶກ ໃຫ້ປິດກິດຈະການຊົ່ວຄາວ ຈໍານວນ 19 ຫົວໜ່ວຍ ພ້ອມທັງປັບໃໝ.

ສ່ວນສະພາບການຊື້-ຂາຍໂດຍລວມເຫັນວ່າປະຕິບັດຕາມລາຄາທີ່ລັດກໍານົດ ແຕ່ມີສ່ວນໜຶ່ງມີການສວຍໂອກາດຂຶ້ນລາຄາສິນຄ້າ ເປັນຕົ້ນຊີ້ນໝູຂາຍເກີນລາຄາ ຊຶ່ງເຈົ້າໜ້າທີ່ໄດ້ເຮັດບົດບັນທຶກກ່າວເຕືອນສຶກສາອົບຮົມ ແລະ ປັບໃໝ (ການຂາຍເກີນລາຄາສ່ວນຫຼາຍແມ່ນຕະຫຼາດຂະໜາດນ້ອຍ ຊື້ຍ່ອຍຈາກລູກຂຽງຕະຫຼາດໃຫຍ່).

ສ່ວນການຊື້-ຂາຍທຽບໃສ່ໄລຍະປົກະຕິຫຼຸດລົງ 35-40% ເຫັນວ່າຕະຫຼາດ ແລະ ຊາວຄ້າຂາຍໃຫ້ການຮ່ວມມືຕາມແຈ້ງການແນະນໍາ ໄດ້ປິດບໍລິການຊົ່ວຄາວເພື່ອຫຼຸດຜ່ອນຄວາມແອອັດ.

ສ່ວນການສະໜອງສິນຄ້າເຫັນວ່າພຽງພໍກັບຄວາມຕ້ອງການໂດຍສະເພາະສິນຄ້າສະບຽງອາຫານທີ່ນອນໃນບັນຊີຄວບຄຸມ ມີປະເພດຊີ້ນໝູທີ່ຂາຍຫຼຸດຈາກລາຄາກໍານົດ ​ໂດຍ​ລັດ​ກຳ​ນົດຊີ້ນໝູປະເພດ 1 ຂາຍ​ໃນລາຄາ​ບໍ່​ເກີນ 48 ພັນກີບຕໍ່ກິໂລ, ແຕ່ໃນຕະຫຼາດ (ບາງ​ແຫ່ງ) ຂາຍ 45 ພັນກີບຕໍ່​ກິໂລ.

ສໍາລັບລາຄາສິນຄ້າພືດຜັກ ແມ່ນມີການເໜັງຕີງຂຶ້ນລົງຕາມລະດູການເປັນບາງວັນ ສະເລ່ຍມີ 3 ລາຍການເໜັງຕີງສູງ ຄື: ຜັກຫອມປ້ອມ, ຫອມບົ່ວ, ຫອມລາບ ປະມານ 50%.​

ຂ່າວ-ພາບ: ກະ​ຊວງ ອ​ຄ

Related Posts

Leave a Reply

Your email address will not be published.