ການຮັບສົ່ງຜູ້ຕິດໂຄວິ ດ ພົບຄວາມຫຍຸ້ງ ຍາກ ແຕ່ຄະນະສະເພາະກິດ ໄດ້ມີຄວາມພະຍາຍຍາມສູງ

ຂປລ. ໃນວັນທີ 3 ຕຸລາ 2021 ທ່ານ ດຣ. ຄໍາໃສ ເດດລືໄຊ ຮອງຫົວໜ້າກົມປິ່ນປົວ ແລະ ໜ້າທີ່ການ ກະຊວງສາທາລະນະສຸກ ໄດ້ໃຫ້ຮູ້ວ່າ: ທີມງານພະນັກງານວິຊາການແພດໝໍ ກຽມພ້ອມໄປຮັບຄົນເຈັບທີ່ຕິດເຊື້ອພະຍາດໂຄວິດ-19 ເພື່ອໄປປິ່ນປົວຈົນສຸດຄວາມສາມາດ,

ແຕ່ເນື່ອງຈາກ ປັດຈຸບັນຄົນເຈັບມີຫລາຍ ແລະ ຢູ່ກະແຈກກະຈາຍຈຶ່ງມີຄວາມຫຍຸ້ງຍາກ ບໍ່ສາມາດໄປຮັບໄດ້ຢ່າງທັນການ ແຕ່ເຖິງຢ່າງໃດກໍຕາມ ການນໍາກະຊວງສາທາລະນະສຸກ ກໍຄື ຄະນະສະເພາະກິດ ໄດ້ມີຄວາມພະຍາຍຍາມສູງ ເພື່ອຄວບຄຸມການລະບາດຂອງພະຍາດໂຄວິດ-19 ໂດຍການຈັດຫາສະຖານທີ່ຈໍາກັດບໍລິເວນ ແລະ ສະ ຖານທີ່ປິ່ນປົວ ໃຫ້ພຽງພໍກັບຜູ້ຕິດເຊື້ອໃນແຕ່ລະມື້,

ໂດຍໄດ້ຂະຫຍາຍໂຮງໝໍພາກສະໜາມຂຶ້ນອີກ 3 ແຫ່ງ ສາມາດຮອງຮັບຄົນເຈັບໄດ້ອີກຈໍານວນຫລາຍ ຄືໂຮງໝໍພາກສະໜາມດາວເຮືອງ ຢູ່ຂົວມິດຕະພາບ1 ສາມາດຮອງຮັບຄົນເຈັບໄດ້ 800 ຄົນ, ໂຮງໝໍສະໜາມກິລາຫລັກ 16 ສາມາດຮອງຮັບໄດ້ 360 ຄົນ, ແລະ ໂຮງຮຽນຝຶກອົບຮົມວິຊາຊີບຄົນພິການສີເກີດ ສາມາດຮອງຮັບຄົນເຈັບໄດ້ທັງໝົດ 600 ກວ່າຄົນ.

ສຳລັບການຮັບຄົນເຈັບທີ່ຕິດເຊື້ອພະຍາດໂຄວິດ-19 ຈຶ່ງກໍານົດໃຫ້ຮັບພຽງແຕ່ 3 ໂຮງໝໍ ຄື ໂຮງໝໍມິດຕະພາບ, ໂຮງໝໍ 103 ກອງທັບ ແລະ ໂຮງໝໍເຊດຖາທິລາດ, ເຊິ່ງທັງ 3 ໂຮງໝໍ ສາມາດຮັບໄດ້ 180 ຄົນ, ເຊິ່ງເປົ້າໝາຍແມ່ນ ຄົນເຈັບທີ່ມີອາການປານກາງຫາອາການໜັກ, ເຊິ່ງໄດ້ນໍາໃຊ້ແພດໝໍຈໍານວນຫລາຍເພື່ອເບິ່ງແຍງປິ່ນປົວ.

ດັ່ງນັ້ນ, ຄົນເຈັບທີ່ມີອາການເບົາບາງ ຈະຖືກສົ່ງໄປປິ່ນປົວຢູ່ພາກສະ ໜາມ. ພ້ອມນີ້, ທາງຄະນະສະເພະກິດ ກໍຄື ກະຊວງສາທາລະນະສຸກ ຍັງໄດ້ສົມທົບຮ່ວມມື ກັບອົງການອະນາໄມໂລກ ຮ່າງຂໍ້ແນະນໍາສໍາລັບຜູ້ຕິດເຊື້ອ ທີ່ບໍ່ມີອາການ, ສາມາດພັກຢູ່ໂຮງແຮມທີ່ມີເງື່ອນໄຂ ເຊິ່ງໄດ້ຮັບອະນຸຍາດຈາກຄະນະສະເພາະກິດແລ້ວ.

ນອກນັ້ນ, ຍັງໄດ້ຮ່າງຂໍ້ແນະນໍາສໍາລັບການຕິດຕາມປິ່ນ ປົວຢູ່ເຮືອນຂອງຜູ້ບໍ່ມີອາການ, ແຕ່ຍ້ອນພະນັກງານແພດໝໍ ມີຈໍານວນຈໍາກັດ, ເຊິ່ງການເປີດໂຮງໝໍພາກສະໜາມຫລາຍຂຶ້ນ ແລະ ມີຄວາມຈໍາເປັນຕ້ອງເອົາພະນັກງານແພດໝໍ ເຂົ້າປະຈໍາຫລາຍຂຶ້ນ ຂະນະດຽວກັນຢູ່ແຕ່ລະໂຮງໝໍ ຍັງຕ້ອງໄດ້ຮັບໃຊ້ປະຊາຊົນເປັນປົກກຕິ.

ທ່ານ ດຣ. ຄໍາໃສ ເດດລືໄຊ ຍັງໄກ້ຮຽກຮ້ອງເຖິງຄົນເຈັບ ຢູ່ໂຮງໝໍພາກສະໜາມ ຈົ່ງໃຫ້ການຮ່ວມມືກັບແພດໝໍ, ໂດຍ ກ່າວວ່າ: ພວກເຮົາຮັບຮູ້ວ່າ ພວກທ່ານອາດຈະບໍ່ໄດ້ຮັບຄວາມສະດວກສະບາຍຄືກັບຢູ່ເຮືອນທ່ານ ຂໍໃຫ້ພວກທ່ານຈົ່ງມີຄວາມອົດທົນ ຜ່ານຜ່າວິກິດໄປພ້ອມກັບແພດໝໍ, ເຊິ່ງຄົນເຈັບທີ່ບໍ່ມີອາຫານຫຍັງຈະໄດ້ຢູ່ໂຮງໝໍພຽງແຕ່ 14 ມື້ ກໍຈະໄດ້ອອກໄປຢູ່ກັບຄອບຄົວ,

ແຕ່ແພດໝໍທີ່ໄປຮັບໃຊ້ທ່ານ ຕ້ອງໄດ້ຫ່າງຈາກຄອບຄົວ, ຫ່າງຈາກຄົນທີ່ເພີ່ນຮັກ ເພື່ອມາຮັບໃຊ້ທ່ານ 14 ມື້ , ຫລັງຈາກນັ້ນຕ້ອງໄດ້ກັກຕົວອີກ 14 ມື້ ແຕ່ຖ້າເຂົາເຈົ້າຕິດເຊື້ອ ໃນເວລາປະຕິບັດໜ້າທີ່ ກໍຕ້ອງໄດ້ໄປປິ່ນປົວອີກ, ເຊິ່ງສິ່ງນີ້ແພດໝໍທຸກຄົນ ແມ່ນບໍ່ປາຖະໜາ, ແຕ່ຍ້ອນໜ້າທີ່ ແລະ ຄວາມຮັບຜິດຊອບຕ້ອງໄດ້ປະຕິບັດ.

Related Posts

Leave a Reply

Your email address will not be published.