ລັດຖະບານອົດສະຕຣາລີ ຊ່ວຍເຫລືອອຸປະກອນກວດເຊື້ອໂຄວິດ ແກ່ ສປປ ລາວ ມູນຄ່າ15ຕື້ກວ່າກີບ.

ພິທີມອບ-ຮັບອຸປະກອນ ແລະ ເຄື່ອງມືກວດຫາເຊື້ອພະຍາດ COVID-19 ມູນຄ່າ 15ຕື້ 400ລ້ານກີບ (2,250,000 ໂດລາອົດສະຕຣາລິ) ຈາກລັດຖະບານ ອົສຕຼາລີ ຜ່ານ ອົງການອະນາໄມໂລກ (WHO) ໄດ້ຈັດຂຶ້ນທີ່ກະຊວງສາທາລະນະສຸກ ໃນຕອນບ່າຍວັນທີ 26 ສິງຫາ 2021 ເຊິ່ງແມ່ນການຊ່ວຍເຫຼືອເພີ່ມເຕີມຂອງປະເທດອົດສະຕຣາລີ ຈຳນວນ 111,6 ຕື້ກີບ (16.2 ລ້ານໂດລາອົດສະຕຣາລີ) ໃຫ້ແກ່ ລັດຖະບານລາວ ດ້ານວັກຊີນກັ ໂຄ ວິ ດ.

ເຂົ້າຮ່ວມໃນພິທີຄັ້ງນີ້ ມີ ດຣ. ບຸນແຟງ ພົມມະໄລສິດ, ລັດຖະມົນຕີກະຊວງສາທາລະນະສຸກ, ທ່ານ ພໍ ເຄັນລື້, ເອກອັກຄະລັດຖະທູດອົດສະຕຣາລີ ປະຈໍາ ສປປ ລາວ ,ທ່ານ ດຣ. ຈຸນ ກາວ, ຮັກສາການຜູ້ຕາງໜ້າອົງການອະນາໄມໂລກປະຈໍາ ສປປ ລາວ ພ້ອມດ້ວຍຄະນະ.

ດຣ. ບຸນແຟງ ພົມມະໄລສິດ ລັດຖະມົນຕີກະຊວງສາທາລະນະສຸກ ກ່າວວ່າ:“ ກະຊວງສາທາລະນະສຸກ ສະແດງຄວາມຂອບໃຈມາຍັງການປະກອບສ່ວນຢ່າງທ່ວງທັນໃນການຕອບໂຕ້ກັບ ໂຄວິ ດ ຈາກ ລັດຖະບານອົດສະຕຣາລີ , ໂດຍສະເພາະຕໍ່ກໍລະນີຜູ້ຕິດເຊື້ອເພີ່ມຂຶ້ນຢ່າງໄວວາໃນເດືອນທີ່ຜ່ານມາໂດຍມີການລາຍງານສະສົມທັງໝົດ 13,909 ກໍລະນີ ໃນວັນທີ 25 ສິງຫາ, ປະຈຸບັນ ກະຊວງສາທາລະນະສຸກ ສາມາດກວດຫາເຊື້ອໄດ້ ໃນເວລາທີ່ສັ້ນຂຶ້ນ.

ໂດຍສະເພາະໃນບັນດາແຂວງພາກເໜືອ ແລະ ພາກໃຕ້ ຜ່ານການເສີມຂະຫຍາຍ ແລະ ການເເບ່ງຂັ້ນຄຸ້ມຄອງດ້ານການກວດຫາເຊື້ອ ເຊີ່ງຈາກການສະໜັບສະໜູນຂອງທຶນຊ່ວຍເຫຼືອດັ່ງກ່າວນີ້.” ການສະໜັບສະໜູນຈາກ ລັດຖະບານອົດສະຕຣາລີ ໄດ້ຊ່ວຍໃຫ້ປະເທດລາວສາມາດຫຼຸດຜ່ອນເວລາໃນການຂົນສົ່ງ ແລະກວດຫາຕົວຢ່າງໃນຂັ້ນສູນກາງ, ຊ່ວຍໃຫ້ມີການດຳເນີນງານທີ່ໄວຂຶ້ນເພື່ອຫຼຸດຜ່ອນການແຜ່ເຊື້ອ, ໂດຍສະເພາະການພົບຕົວເລກບັນທຶກປະຈໍາວັນທີ່ສູງທີ່ສຸດຈໍານວນ 952 ກໍລະນິຕິດເຊື້ອໃນວັນທີ 25 ສິງຫາ 2021.

ທ່ານ ພໍ ເຄ້ນລີ້ ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ກ່າວວ່າ: ປະເທດອົດສະຕຣາລີ ພູມໃຈທີ່ໄດ້ຊ່ວຍເຫຼືອ ລັດຖະບານລາວ ໃນການຕໍ່ສູ້ກັບພະຍາດໂຄວິດ -19. ປະເທດອົດສະຕຣາລີ ມີຄວາມມຸ່ງໝັ້ນທີ່ຈະໃຫ້ການຊ່ວຍເຫຼຶອຫຼາຍກວ່າ 127 ຕື້ກີບ (18.45 ລ້ານໂດລາອົດສະຕຣາລີ) ໃຫ້ປະເທດລາວ ເພື່ອໃຫ້ບໍລິການສັກວັກຊີນທີ່ປອດໄພ ແລະ ມີປະສິດທິພາບ. ໃນສ່ວນໜຶ່ງຂອງການສະໜັບສະໜູນຊຸດນີ້, ອົດສະຕຣາລີ ໃຫ້ການຊ່ວຍເຫຼືອ 15 ຕື້ 400ລ້ານກີບ (2,25 ລ້ານໂດລາອົດສະຕຣາລີ) ໃຫ້ແກ່ລັດຖະບານລາວ ໂດຍຜ່ານ ອົງການອະນາໄມໂລກ ເພື່ອຊ່ວຍໃນການຈັດຊື້ອຸປະກອນ ແລະ ເຄື່ອງມືສໍາລັບກວດຫາເຊື້ອ ໂຄວິ ດ ແລະ ເສີມສ້າງຄວາມສາມາດໃຫ້ແກ່ຫ້ອງວິເຄາະ, ເພື່ອຊ່ວຍກຽມຄວາມພ້ອມ ແລະ ຕອບໂຕ້ກັບໂດວິດ ຂອງປະເທດລາວ.

ຕັ້ງແຕ່ເລີ່ມມີການແຜ່ລະບາດ, ຄວາມສາມາດໃນການກວດເຊື້ອໃນທົ່ວປະເທດໄດ້ເພີ່ມຂຶ້ນຈາກ 500 ຄົນຕໍ່ມື້ມາເປັນ2,000-3,000 ຕົວຢ່າງຕໍ່ມື້, ໃນເວລາດຽວກັນ, ທຶນຊ່ວຍເຫຼືອດັ່ງກ່າວຍັງຈະຖືກນໍາໃຊ້ເຂົ້າໃນການຕິດຕາມກວດກາຫ້ອງວິເຄາະຢູ່ຂັ້ນແຂວງເພື່ອຮັບປະກັນວ່າຫ້ອງວິເຄາະເຫຼົ່ານັ້ນໄດ້ຕາມມາດຕະຖານຄວາມປອດໄພດ້ານຊີວະພາບ ແລະມາດຕະຖານຫrງຄຸນະພາບ.

Leave a Reply

Your email address will not be published.