ຄະນະສະເພາະກິດ ຮຽກຮ້ອງໃຫ້ແຮງງານທີ່ຢູ່ສູນກັກຕົວ ໃຫ້ຮັກແພງສາມັກຄີ ຊ່ວຍເຫລືອເຊິ່ງກັນ ແລະ ກັນ

ທ່ານ ດຣ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າຄະນະສະເພາະກິດ ລາຍງານໃນວັນທີ 21 ສິງຫາ 2021 ນີ້ວ່າ: ການເດີນທາງເຂົ້າ ສປປ ລາວ ຕາມຈດຸຜ່ານແດນ ວັນທີ 20 ສິງຫາ 2021 ມີຜູ້ເດີນທາງຜ່ານດ່ານເຂົ້າມາ ສປປ ລາວ ຈຳນວນທັງໝົດ 2.748 ຄົນ,

ທຸກຄົນເດີນທາງເຂົ້າມາທັງໝົດແມ່ນໄດ້ຖືກເກັບຕົວຢ່າງກວດຊອກຫາເຊື້ອພະຍາດໂຄວິດ-19 ແລະ ນຳສົ່ງເຂົ້າໄປຈຳກັດບໍລິເວນທີ່ທາງຄະນະສະເພາະກິດກຳນົດໄວ້ຈົນຄົບ 14 ວັນ ຈຶ່ງຈະເຄື່ອນໄຫວໄດ້. ມາຮອດປັດຈຸບັນທົ່ວປະເທດມີສູນຈຳກັດບໍລິເວນທີ່ເປີດນຳໃຊ້ຢູ່ທັງໝົດ 107 ສູນ ແລະ 51 ໂຮງແຮມ, ມີຜູ້ຈຳກັດບໍລິເວນທັງໝົດ 11.746 ຄົນ.

ໃນສະພາບການກັບມາຂອງແຮງງານຈຳນວນຫລວງຫລາຍ, ລັດຖະບານໄດ້ເອົາໃຈໃສ່ ແລະ ເລັ່ງໃຫ້ບັນດາແຂວງຕ້ອງໄດ້ຈັດສັນໃຫ້ມີສະຖານທີ່ຈຳກັດບໍລິເວນ ເພື່ອຮອງຮັບແຮງງານທີ່ກັບຄືນມາໃຫ້ໄດ້ຈຳກັດບໍລິເວນຄົບຕາມກຳນົດເວລາທີ່ຄະນະສະເພາະກິດໄດ້ກຳນົດໄວ້ ແລະ ຕ້ອງຈັດສັນໃຫ້ມີໂຮງໝໍພາກສະໜາມ, ສະຖານທີ່ຈຳກັດບໍລິເວນ ຫລັງຈາກຄົບກຳນົດປິ່ນປົວ (14+7) ເພື່ອສາມາດຮອງຮັບຈຳນວນແຮງງານທີ່ຕິດເຊື້ອພະຍາດໂຄວິດ-19, ນັ້ນກໍແມ່ນສະແດງເຖິງຄວາມເປັນຫ່ວງເປັນໃຍ ແລະ ຄວາມເອົາໃຈໃສ່ຂອງລັດຖະບານຕໍ່ກັບແຮງງານທຸກຄົນທີ່ກັບຄືນມາປະເທດ.

ພ້ອມນີ້, ກໍຂໍຮຽກຮ້ອງໃຫ້ແຮງງານທີ່ຢູ່ໃນສະຖານທີ່ຈຳກັດບໍລິເວນຈົ່ງໄດ້ມີຄວາມອົດທົນ, ຮັກແພງສາມັກຄີກັນ, ໃຫ້ການຊ່ວຍເຫລືອເຊິ່ງກັນ ແລະ ກັນ,​ ໃນເມື່ອທຸກຄ້ນເລືອກທີ່ຈະກັບຄືນມາປະເທດຊາດບ້ານເມືອງຂອງຕົນແລ້ວ ກໍຈົ່ງສືບຕໍ່ປະຕິບັດຕາມຫລັກການ ແລະ ມາດຕະການທີ່ຄະນະສະເພາະກິດວາງອອກໃຫ້ຖືກຕ້ອງ, ຄົບຖ້ວນ, ເມື່ອຄົບກຳນົດຈຳກັດບໍລິເວນແລ້ວ ກໍຈະໄດ້ຮັບອະນຸຍາດໃຫ້ກັບຄືນໄປບ້ານເກີດເມືອງນອນ ແລະ ກໍຈະບໍມີຄວາມສ່ຽງທີ່ຈະນຳເຊື້ອພະຍາດມາແພ່ໃສ່ຄົນໃນຄອບຄົວ, ຊຸມຊົນ ແລະ ທຸກຄົນໃນສັງຄົມ.

Leave a Reply

Your email address will not be published.